Hezkuntza hirueleduna

Hainbat hizkuntzatan hitz egiten jakitea ezinbestekoa da egungo munduan. JM Bilbao ikastetxetik irteten direnean, ikasleak euskaraz, gaztelaniaz eta ingelesez hitz egiteko gai dira, eta, horretarako, hiru hizkuntzak erabiltzen ditugu, orekaz, jakintzak transmititzeko garaian eta curriculumaren arlo ezberdinetan, baita ikastetxeko bizitzako esparru ezberdinetan ere.

Gure ikasleek hainbat hizkuntza hitz egiteak eta komunikatzeko beste modu batzuk ezagutzeak duen garrantzia uler dezaten nahi dugu, konturatu daitezela hizkuntzak altxor bat direla eta horiek erabiltzen goza dezatela. Gainera, eskolakoez gain beste edozer hizkuntza ikasteari irekita egotea nahi dugu; esaterako, frantsesa. 

Urte hauetan gure eredu hirueledunean hobekuntzak sartzen joan gara, etengabeko ebaluazioari eta geure burua hobetzeko nahiari esker:

• Euskararen astea Haur Hezkuntzan.
• Euskararen presentzia handia Haur Hezkuntzan eta Lehen Hezkuntzan (irakurketa eta idazketa).
• Hizkuntzak ikasteko murgiltze asteak Lehen Hezkuntzan (ingelesa eta euskara).
• Ingelesaren kanpoko ebaluazioa Lehen eta Bigarren Hezkuntzan, Cambridgeko azterketa zentro baikara.
• Inklusibitate Plana esparru hirueledunean.
• Hezkuntza Hirueledunaren Esparruko Esperimentazio Proiektua (DBH).
• Euskara eta ingelesa indartzen dituen Batxilergoa eta Batxilergo Duala.
• Euskara azterketen prestakuntza, Hizkuntza Eskola Ofizialean, eta frantsesekoena, Frantziako Institutuan.

Estimulazio goiztiarra

Estimulazio Goiztiarraren helburua haurren garapena sustatzea da, hain zuzen haien garuna plastikoagoa den eta hazte prozesu betean den etapan. Helburua askotariko estimulu ugari eskaintzea da, neuronen artean lotura berriak sortu eta indartu daitezen, bizi osorako iraungo duten zirkuitu neurologikoak eraikita.

Estimulazio Goiztiarra ez da haur eskolan egiten diren gainerako jardueretatik bereizi dagoen atal gisa ulertu behar. Haurrekin igarotzen dugun denbora erabiltzeko moduari buruzko kontzeptu berri bat da, eta horren bitartez emaitza onenak lortzeko, kualifikazio handiko profesionalen laguntza behar dugu. Lan hori egiten du, hain zuzen, JM Bilbaoko talde espezializatuak.

Askotariko adimenak

Guztiak desberdinak bagara, eta bakoitzak bere garun bakar eta berezia badu ere, eskola tradizionalak ikasteko modu bakarra jorratu izan du beti, eta ikasleak beren gaitasun orokorren arabera sailkatu ditu. Nolanahi ere, irakaskuntzaren eta adimenaren ikuspegi hori mugatuegia da, egiaz askotariko adimenak baititugu eta guztiak baitira garrantzitsuak. Hezkuntzaren lana adimen horiek modu ekitatiboan ulertzea da.

Berez, haurren indarguneak identifikatzea da gakoa, haien gabeziak identifikatu beharrean, eta behin identifikatuta, horiek bultzatzea, bakoitzak bere ahalmenak sendotu ahal izan ditzan. Curriculum erabat uniformeak dituen irakaskuntzaren aurrean, ikasleek irakasgai berberak modu berberean aurkeztuta ikasi behar dituzten ereduaren aurrean, JMBn irakaskuntza askoz ere pertsonalizatuagoaren alde egiten dugu, haur bakoitzaren premia berezietara egokituriko irakaskuntzaren alde, haren bitartez haurren sormena eta taldean lan egiteko gaitasuna sustatzeko.

Gatazken kudeaketa

Eskola-bizikidetza gizartearen jarreraren islada dela sinesten dugu. Hori dela eta, programa honen helburu nagusia giza-harremanetan sortzen diren zailtasunak kooperatiboki jorratzea eta hobetzea da, estrategiak ikasiz eta hausnarketa prozesuak bultzaraziz. 

Gatazken Prebentzio eta Kudeaketa Programa honen baitan JM Bilbao Ikastetxeak honako baliabideak ditu:

• Adostoki (3-9 urte): Adostokien bitartez ikasleen arteko liskarrak kudeatzea eta ekiditea lortu nahi da. Horretarako, 3 urte dituztenetik errekurtso eta tresna ezberdinak berenganatzen dituzte, bai ikasgelan baita ikasgelaz kanpo sortzen zaizkien gatazkak enpatia, hitza eta asertibitatea bezalakoak erabiliz konpon ditzaten.
• Bitartekaritza (10-16 urte): metodo egituratu honen bitartez gatazkak elkarri lagunduz eta modu baketsuan jardunez kudeatzen dira, inplikatuta dauden guztien interes eta beharrizanetan oinarrituz. Gatazkatik kanpo dagoen hirugarren pertsona objektibo bat sartzen da jokoan (bitartekaria), zeinak komunikazioa erraztu eta arazoan sartuta daudenen arteko akordioa bultzatuko duen.

Bi programetan, ikasleak beraiek dira gatazkak konpontzen saiatzen direnak, helduaren bitartekaritzarik gabe. Berdinen arteko gatazken kudeaketan datza, zeinak enpatia sustatzen duen, adimen emozionalaren ezaugarri garrantzitsua. Gure erronka, beraz, gatazkak, harremanak eta pertsonak kooperazioaren eta adiskidetzearen bitartez eraldatzea da.